انصار( د تله ۷مه)، د طالبانو د کورنیو چارو وزیر سراج الدین حقاني پنجشېر ته د سفر پر مهال د دغه ولایت خلک ستایلي، خو پر سیاسي مشرانو یې نیوکې کړي.
نوموړي ویلي، چې د پنجشېر خلک مېړني دي، د روسانو خلاف یې جهاد کې مهمه ونډه لرلې او د خپلو سیاسي مشرانو پياوړی ملاتړ یې کړی.
د ده په وینا، د پنجشېر سیاسي مشرانو بیا برعکس د خلکو له ملاتړ څخه د ځان لپاره ګټه اخیستې او اوس یې خلک هم پوه شوي او ملاتړ نه ورڅخه کوي.
سراج الدین حقاني د دغه سفر پر مهال د خپل رژیم خلاف جګړه نا مشروع ګڼلې او ویلي، چې د بهرنیانو له وتو وروسته د جګړې جواز نشته.
هغه مخکې یو شمېر نورو ولایتونو ته هم ورته سفرونه کړي او پر مهال یې بهر ته تللي افغانان هېواد ته ستنیدو ته بللي دي.
د طالبانو منتقدان بیا د حقاني داسې بلنې او څرګندونې نمایشي او تبلیغاتي بولي او باور لري، چې که طالب مشران په رېښتیا نورو افغانانو سره د جوړجاړي فکر لري، د بهر ته تللو کسانو د ستنولو پرځای په هېواد کې شته کادرونه ځانته نږدې او له وړتیاوو یې ګټه واخلي، څو دوی هم له هېواده وتو ته مجبور نه شي.
URL تعقيب: https://www.ansarpress.com/pashto/27356
امرالله صالح: د طالب جګړه د دین لپاره نه د قدرت لپاره ده، د نورو د ګټو لپاره خپل خلک وژني